Siyavuş Novruzov: Bələdiyyələr 300–500 min qeydiyyatsız evdən vergi toplaya bilmir

Azərbaycanda bələdiyyələr 300–500 min qeydiyyatsız evdən əmlak vergisi toplaya bilmir və bu problemin həlli üçün qanunvericiliyə mərhələli dəyişikliklər edilməlidir. Bunu deputat Siyavuş Novruzov Milli Məclisdə çıxışı zamanı deyib.

Onun sözlərinə görə, qeydiyyata alınmayan evlərin sahibləri bələdiyyələrə illik əmlak vergisi ödəmirlər və nəticədə yerli özünüidarəetmə orqanları əhəmiyyətli gəlirdən məhrum olur.

“Qanunsuz evlər qeydiyyatda deyil. Onlar bələdiyyəyə ildə bir dəfə əmlak vergisi verməlidirlər, amma bu vergini ödəmirlər. Nəticədə bələdiyyələr 300 min–500 min evdən vergi yığa bilmir”, - deputat bildirib.

Novruzov problemin həlli üçün Vergi Məcəlləsinə və digər qanunvericilik aktlarına dəyişikliklərin edilməsini təklif edib.

Deputat fiziki və hüquqi şəxslərin bələdiyyələrə ödədiyi vergilərin eyni səviyyədə müəyyənləşdirilməsini də düzgün hesab etmədiyini bildirib. Onun sözlərinə görə, qaz, su və elektrik enerjisi tariflərində hüquqi şəxslər üçün fərqli yanaşma tətbiq edilsə də, bələdiyyə vergilərində belə fərq nəzərdə tutulmayıb. Bu isə bələdiyyələrin maliyyə imkanlarının genişlənməsinə mane olur.

Siyavuş Novruzov, həmçinin bələdiyyələrin yaradılmasından 27 il keçməsinə baxmayaraq, onların mülkiyyət xəritələrinin hələ də tam şəkildə təqdim edilmədiyini deyib.

“Biz Nazirlər Kabineti qarşısında dəfələrlə məsələ qaldırmışıq. Ancaq 27 il ərzində bələdiyyə mülkiyyətinin xəritələri tam şəkildə bələdiyyələrə verilməyib”, - o qeyd edib.

Deputat bildirib ki, xəritələrin təqdim olunması bələdiyyə ərazilərinə düşən dağ-mədən və sənaye sahələrinin dəqiq müəyyənləşdirilməsi baxımından da vacibdir. Onun fikrincə, təklif olunan dəyişikliklər bələdiyyələrin gəlirlərini artırmaqla yanaşı, ərazilərdə abadlıq və quruculuq işlərinin maliyyələşdirilməsinə imkan verəcək.

Gülnar Nazimqızı