Kürdəmir toyunda zəhərlənənlərin sayı 91-ə çatıb - Yenilənib

Baş Prokurorluq kütləvi zəhərlənmə hadisəsi ilə bağlı araşdırma aparır. Bu barədə qurumdan bildirilib. 

"Sentyabrın 30-da Kürdəmir şəhəri ərazisində yerləşən iaşə obyektlərindən birində keçirilən məclisdə iştirak etmiş şəxslərdən 92 nəfərin qida zəhərlənməsi şübhəsilə xəstəxanaya müraciət etməsi faktı ilə bağlı rayon prokurorluğunda araşdırma aparılır.Zəhərlənmənin səbəbinin müəyyənləşdirilməsi məqsədilə iaşə obyektindəki qidalardan nümunələr götürülərək müvafiq ekspertizalar təyin edilib və digər zəruri prosessual hərəkətlər icra olunub",- açıqlamada deyilir. 

10:18

Kürdəmir rayonunda toy mərasimində zəhərlənmə şübhəsi ilə xəstəxanaya müraciət edənlərin sayı 91 nəfərə çatıb. Bu barədə TƏBİB məlumat yayıb. 

Bildirilib ki, sentyabrın 30-u saat 20:50 radələrində 91 nəfər zəhərlənmə şübhəsi ilə Kürdəmir Rayon Mərkəzi Xəstəxanasına hospitalizasiya olunub.

Onların hər birinə zəruri tibbi yardım göstərilib. Vəziyyətləri qənaətbəxş qiymətləndirilən şəxslər ambulator müalicə üçün evə buraxılıb.

Hadisə şəhər ərazisində yerləşən “Günəş” restoranında keçirilən toy mərasimində baş verib. İlkin məlumatda zəhərlənənlərin sayının 13 olduğu bildirilsə də, sonrakı saatlarda xəstəxanaya müraciət edənlərin sayı artıb. Onların arasında azyaşlıların da olduğu bildirilib.

Hadisə ilə bağlı Azərbaycan Qida Təhlükəsizliyi Agentliyinin (AQTA) əməkdaşları əraziyə cəlb olunub və müvafiq yoxlamalar aparılır.

Faktla bağlı araşdırma davam etdirilir.