Gəncədə antisanitar şəraitdə dönər əti hazırlayan sexin fəaliyyəti dayandırılıb

Gəncədə antisanitar şəraitdə toyuq ətindən dönər məhsulu hazırlayaraq dönərxanalara satan emal sexinin fəaliyyəti dayandırılıb. Bu barədə Azərbaycan Qida Təhlükəsizliyi Agentliyi (AQTA) məlumat yayıb.

Bildirilib ki, sexdə toyuq ətlərinin baytarlıq-sanitariya və sanitariya-gigiyena normalarına əməl edilmədən sümükdən ayrıldığı və dönərxanalara satışının həyata keçirildiyi müəyyənləşdirilib.

Yoxlama zamanı donmuş toyuqların açıq havada donunun açıldığı, məhsulların baytarlıq ekspertizasından keçirilmədiyi, etiketləmə və markalanma aparılmadan dönərxanalara paylandığı aşkarlanıb.

Həmçinin ətin şəxsi nəqliyyat vasitəsi ilə, temperatur rejiminə əməl edilmədən daşındığı müəyyən olunub.

Obyektdən ət nümunələri götürülərək laborator müayinəyə göndərilib. 840 kq donmuş və 22 kq donu açılmış toyuq əti isə saxlanca qoyulub.

Faktla bağlı inzibati protokol tərtib edilib, icrası məcburi göstərişlər verilib və obyektin fəaliyyəti dayandırılıb.