CAMCA-2026: Beynəlxalq əməkdaşlıq təhsilin inkişafına yeni imkanlar yaradır

Beynəlxalq əməkdaşlıq müxtəlif ölkələrin universitetləri və mütəxəssisləri arasında təcrübə mübadiləsinin aparılmasına imkan yaradır və müasir təhsilin inkişafına mühüm töhfə verir. Bunu “Stirling” Fondunun Levant, Türkiyə və Qafqaz üzrə regional direktoru Brittni Stirlinq Bakıda keçirilən “CAMCA-2026” Regional Forumunda deyib.

Onun sözlərinə görə, təhsil yalnız biliklərin bir tərəfdən digər tərəfə ötürülməsi ilə məhdudlaşmır. Müxtəlif ölkələrdən universitetlərin, müəllimlərin və mütəxəssislərin bir araya gətirilməsi yeni təcrübə və imkanların formalaşmasına şərait yaradır.

Stirlinq bildirib ki, fondun fəaliyyətində yerli potensialın inkişafı da əsas istiqamətlərdən biridir.

“European School in Tbilisi”nin Müşahidə Şurasının sədri Gela Bejuaşvili isə təhsil sisteminin texnologiya və süni intellekt sahəsindəki sürətli inkişafı nəzərə alaraq yenilənməsinin vacibliyini vurğulayıb.

Onun sözlərinə görə, təhsil sisteminin texnologiyaların və süni intellektin inkişaf tempi ilə tam ayaqlaşması çətin olsa da, bu istiqamətdə səylər davam etdirilməlidir.

Bejuaşvili STEM təhsilinin genişləndirilməsini, beynəlxalq məktəb mübadilələrinin artırılmasını, sahibkarlıq bacarıqları və rəqəmsal savadlılığın inkişaf etdirilməsini vacib hesab etdiyini bildirib.

O, həmçinin kibergigiyena üzrə əsas biliklərin yalnız şagirdlərə deyil, müəllimlərə və valideynlərə də öyrədilməsinin zəruriliyini qeyd edib.

Avstraliya Milli Universitetinin diplomatiya üzrə fəxri professoru Vilyam Meli isə Əfqanıstanda təhsilin vəziyyətinə diqqət çəkib.

Aytac