Sentyabrda 593 kiloqramdan çox narkotik dövriyyədən çıxarılıb

Dövlət Sərhəd Xidməti (DSX) 2026-cı ilin sentyabrında 593 kiloqram 439 qram narkotik vasitə və 11 504 ədəd müxtəlif tərkibli həb aşkarlayaraq dövriyyədən çıxarıb.

DSX-dən bildirilib ki, aşkarlanan narkotik vasitələrin 296 kiloqram 178 qramı müxtəlif vaxtlarda uçuş aparatları vasitəsilə müəyyən edilib.

Hesabat ayında dövlət sərhədini pozduqlarına görə 20 nəfər saxlanılıb. Onlardan 6-sı Pakistan, 4-ü Azərbaycan, 4-ü İran, 2-si Şri-Lanka, 1-i Əfqanıstan, 1-i Belarus, 1-i Gürcüstan və 1-i Türkiyə vətəndaşı olub.

Qanunsuz miqrasiyaya qarşı tədbirlər çərçivəsində saxtalaşdırılmış tarix möhürü və pasportdan, eləcə də özgəsinə məxsus sənəddən istifadə etməklə dövlət sərhədini keçməyə cəhd göstərən 10 nəfər saxlanılıb.

Sərhəd rejimi qaydalarını pozduqları üçün 38 nəfər barəsində müvafiq tədbirlər görülüb.

Cinayətkarlığa qarşı mübarizə tədbirləri nəticəsində hüquq-mühafizə orqanları tərəfindən axtarışda olan 324 nəfər saxlanılaraq aidiyyəti qurumlara təhvil verilib.

Bundan başqa, ölkədən çıxışı qadağan edilən 855 nəfərin ölkəni tərk etməsinin, ölkəyə girişi qadağan olunan 54 nəfərin isə Azərbaycana daxil olmasının qarşısı alınıb.

DSX dövlət sərhədinin etibarlı mühafizəsinin təmin edilməsi istiqamətində tədbirlərin davam etdirildiyini bildirib.

Gülnar Nazimqızı