Fermerlərin gəliri artırılacaq- nazir

Azərbaycanda kənd təsərrüfatında daha az resursla daha çox məhsul istehsalına keçid çərçivəsində fermerlərin gəlirini artıracaq, ixrac potensialı olan və ölkənin ərzaq təhlükəsizliyinə töhfə verən məhsullara üstünlük veriləcək. Bunu kənd təsərrüfatı naziri Məcnun Məmmədov anews.az-ın sualına cavab verərkən deyib. 

Fermerə daha çox qazanc gətirəcək istənilən məhsula üstünlük verilə bilər. Konkret məhsul seçimləri, məsələn, ixracyönümlü və daha çox dəyər yaradan məhsullar olmalıdır. Bura istixana məhsulları, örtük altında yetişdirilən məhsullar daxildir. Son illərdə bu istiqamət Cəlilabadda, Şəmkirdə geniş yayılıb. Bunun mütləq böyük istixana olması şərt deyil, eyni zamanda yerüstü örtük altında yetişdirilən məhsullar da ola bilər. Məsələn, Saatlıda bibər layihəsi var və fermerlər çox gözəl nəticələr əldə ediblər. Fermerin gəlirini artıracaq və ixrac potensialı olan istənilən istiqamətə üstünlük verilə bilər. Bununla paralel olaraq strateji məhsullar, xüsusilə taxıl məhsulları da istehsal edilməlidir ki, ölkənin ərzaq təhlükəsizliyi təmin olunsun", - nazir bildirib.

Məmmədov qeyd edib ki, kənd təsərrüfatının müxtəlif istiqamətləri üzrə hədəflər dövlət proqramında müəyyənləşdirilib.

“Əslində, dövlət proqramında hədəflər müəyyənləşdirilib. Həm taxılla bağlı, həm ixracla bağlı hədəflər var. Eyni zamanda balıqçılıq, heyvandarlıq və süfrəçiliklə bağlı hədəflər də müəyyənləşdirilib. Subsidiya Şurasının qərarları da məhz bu istiqamətdə atılan addımlardır. Hər bir təşviq mexanizmi özəl sektorun həmin istiqamətlərə yatırım etməsinə və investisiya qoymasına xidmət edir", - nazir əlavə edib. 

Nazir daha əvvəl Ağdamda çıxışı zamanı kənd təsərrüfatında daha az resursla daha çox məhsul istehsalına keçidin vacibliyini qeyd edib.

Gülnar Nazimqızı