2027-ci ildən artezianlara günəş paneli üçün 50% güzəşt olacaq - nazir

Azərbaycanda 2027-ci il yanvarın 1-dən kənd təsərrüfatı obyektlərinə, əsasən də artezian quyularına günəş panellərinin quraşdırılması xərclərinin 50%-nin dövlət tərəfindən qarşılanması nəzərdə tutulur. Bunu kənd təsərrüfatı naziri Məcnun Məmmədov bildirib.

“1 yanvar 2027-ci il tarixdən günəş panellərinin quraşdırılmasına 50 faiz dövlət güzəşti veriləcək, kənd təsərrüfatı təyinatlı obyektlərdə və əsasən də su təyinatlı artezianlarda”, - Məmmədov deyib. Onun sözlərinə görə, Subsidiya Şurası bu barədə artıq qərar qəbul edib.

Nazir bildirib ki, bu dəstək artezian quyularının elektrik xərclərini azaldaraq fermerləri onlardan istifadəyə təşviq edə bilər.

Məmmədov aqrar istehsalçıların reytinq sisteminin də necə işləyəcəyini açıqlayıb. Onun sözlərinə görə, fermerlər Elektron Kənd Təsərrüfatı İnformasiya Sistemindəki şəxsi kabinetlərindən reytinqlərini və hər meyar üzrə topladıqları balları görə biləcəklər. Reytinq aqrotexniki tədbirləri, iqtisadi nəticələri və ekoloji fəaliyyəti qiymətləndirəcək. Fermerlər qiymətləndirmə ilə razılaşmadıqda nazirliyə müraciət edə biləcəklər.

Nazir bildirib ki, məhsulun maya dəyərindən aşağı satılması riskinə qarşı bazar qiymətlərinin sığortalanması təklifi dövlət qurumları arasında razılaşdırılır. Təklif qəbul olunarsa, bunun üçün qanunvericiliyə dəyişikliklər hazırlanacaq.

Gülnar Nazimqızı