ABŞ-da neft ehtiyatlarının azalması qiymətlərin artmasına səbəb olub

Arxada qalan həftə ərzində neftin qiyməti dəyişkən dinamika nümayiş etdirsələr də, OPEC+ alyansı ilə bağlı vəziyyətin neft ehtiyatlarının artmasına səbəb ola biləcəyi narahatlığı qalmaqdadır.

"Report” "Investing.com”a istinadən xəbər verir ki, Şimal dənizində hasil olunan "Brent” neftinin sentyabr fyuçersləri 0,30% bahalaşaraq, 1 bareli 74,34 ABŞ dollarına satılıb. WTI neftinin avqust fyuçerslərinin qiyməti isə 0,41% yüksələrək, 1 bareli 73,24 dollar təşkil edib.

ABŞ-da neft və benzin ehtiyatları azalıb. Bununla belə, ABŞ Energetika Nazirliyinin məlumatına görə, benzinə olan tələbat 2019-cu ildən sonra ən yüksək həddə çatıb.

Ötən həftənin nəticələrinə əsasən ABŞ-da "qara qızıl” ehtiyatı 6,9 milyon barel azalaraq, 445,5 milyon barelə çatıb. Analitiklər azalmanın 4 milyon barel olacağını güman edirdilər. Bundan başqa, həftə ərzində ölkədə benzin ehtiyatları 6,1 milyon barel azalıb. Azalmanın 2,2 milyon barel olacağı proqnozlaşdırılırdı.