Azərbaycan qazını nəql edən IGB ilə ötürülən yanacağın həcmi açıqlanıb

2022-ci il oktaybrın 1-də işə salınan Yunanıstan və Bolqarıstan arasında birləşdirici boru kəməri Azərbaycan qazını Bolqarıstana çatdıran Yunanıstan-Bolqarıstan birləşdirici boru kəməri (IGB) vasitəsi ilə 16,4 milyon MVt-dan çox elektrik enerjisi ekvivalentində yanacaq nəql edilib. Bu barədə ICGB layihə şirkəti məlumat yayıb.

"Birinci il ərzində IGB qaz təchizatında böyük fasilələr olmadan bütün gündəlik tələbləri yerinə yetirərək qüsursuz nəticələr əldə etdi. Bu nailiyyət bizim əməliyyat prosedurlarımıza ciddi riayət etməklə, eləcə də ICGB-nin görkəmli peşəkarlarından ibarət xüsusi komanda sayəsində mümkün olub”, - ICGB-nin İcraçı Direktorları Teodora Georgiyeva və Corc Satlas bildiriblər.

Hazırda IGB-nin 39 qeydiyyatdan keçmiş istifadəçisi var

 

Ümumi uzunluğu 182 kilometr olan boru kəmərinin 150 kilometrlik hissəsi Bolqarıstan ərazisindən keçir.

Kommersiya istismarına ötən ilin 1 oktyabr tarixində başlanılan boru kəmərinin ötürmə gücünü gələcəkdə 5 mlrd. kubmetrə çatdırmaq planlaşdırılır.

Bolqarıstanın "Bulgargaz" şirkəti "Şahdəniz-2" layihəsi çərçivəsində "Şahdəniz" konsorsiumu ilə ildə 1 mlrd. kubmetr qazın nəqli ilə bağlı müqavilə imzalayıb. Azərbaycan 2020-ci il dekabrın 31-dən Trans-Adriatik boru kəməri (TAP) vasitəsilə Avropaya qaz ixracına başlayıb. Bu boru kəməri Yunanıstan, Albaniya və Adriatik dənizindən keçməklə İtaliyanın cənubuna qədər uzanır.

 

Hazırda Avropada Azərbaycan qazının alıcıları İtaliya, Yunanıstan, Bolqarıstan və Rumıniyadır.