MOL və SOCAR “Şamaxı-Qobustan” yatağı üzrə müqavilə şərtlərini razılaşdırdı

Macarıstanın MOL Hungarian Oil and Gas Plc (MOL Group) şirkəti və Azərbaycanın Dövlət Neft Şirkəti (SOCAR) iyunun 3-də Azərbaycanın quru sahəsində yerləşən “Şamaxı-Qobustan” yatağında kəşfiyyat, işlənmə və hasilatın pay bölgüsü üzrə gələcək sazişin əsas şərtlərini razılaşdırıblar. Bu barədə SOCAR məlumat yayıb.

Razılaşmaya əsasən, layihənin operatoru 65% pay ilə MOL olacaq, SOCAR isə 35% paya malik olacaq.

“MOL Group-un Azərbaycanda beşillik fəaliyyətini qeyd etdiyi bir ildə SOCAR ilə yeni sazişin imzalanması əməkdaşlığımızın dərinləşməsinə və gələcək kəşfiyyata sadiqliyimizi göstərir. Strategiya tərəfdaşlığımızın genişlənməsi uğurlu əməkdaşlığımızı və ortaq məqsədlərimizi əks etdirir”, — MOL-un İdarə Heyətinin sədri və baş icraçı direktoru Jolot Hernadi bildirib.

Hazırda MOL “Azəri-Çıraq-Günəşli” yatağının işlənməsi layihəsində 9,57% və Bakı-Tbilisi-Ceyhan neft kəmərində 8,9% paya malikdir.

Azərbaycan Prezidenti daha əvvəl SOCAR-a “Şamaxı-Qobustan” üzrə müqavilənin 2026-cı ilin əvvəlinə qədər imzalanması üçün hazırlıq tapşırığı verib.

Hazırda tərəflər sazişin əsas prinsiplərini razılaşdırır.

MOL və SOCAR 2024-cü il sentyabrın 20-də “Şamaxı-Qobustan” blokunun işlənməsi üzrə Anlaşma Memorandumu imzalayıblar. Azərbaycanın ən qədim neft yataqlarından biri olan bu sahənin işlənməsi üçün reabilitasiya, investisiya və yeni texnologiyaların tətbiqi tələb olunur.

Macarıstan əvvəllər Rusiya enerji daşıyıcılarından asılı olsa da, indi mənbələrin şaxələndirilməsi siyasəti yürüdür və Azərbaycanı şəffaf şərtlərlə etibarlı tərəfdaş kimi görür.

N.Təbrizli