Azərbaycanda Fintex sahəsində ani ödənişlər 40% artıb

Azərbaycanda ani ödəniş sistemləri vasitəsilə əməliyyatların sayı bir ildə 40%-dən çox artıb. Bu barədə Azərbaycan Mərkəzi Bankının sədr müavini Vüsal Xəlilov  Fintex Sammitində çıxış edərkən bildirib. 

Onun sözlərinə görə,  2025-ci ilin ilk dörd ayında ölkədaxili ödəniş kartları ilə edilən nağdsız əməliyyatların həcmi 67%, əməliyyatların sayı isə 91% artıb.

Hazırda ölkədə hər on əməliyyatdan doqquzu nağdsız həyata keçirilir.

Mərkəzi Bank rəsmisi vurğulayıb ki, fintex sektoru rəqəmsal dövrdə istifadəçilərin sürətli, təhlükəsiz və fərdi xidmət gözləntilərini qarşılamaq üçün əsas vasitəyə çevrilib.

“Hazırda biz açıq bankçılıq, paylanılmış KYC və ani ödəniş sistemləri üzərində işləyirik. Bu texnoloji həllər fintexlər üçün yeni imkanlar yaradacaq,” –  o bildirib.

Rəsmiyə görə, Mərkəzi Bank süni intellekt əsaslı nəzarət modelləri, İT və Data idarəetməsi, eləcə də kibertəhlükəsizlik standartlarının tətbiqi ilə sektorda dayanıqlılığı gücləndirməyə çalışır.

İyul ayında proqramlaşdırma üzrə dünya çempionatı – ICPC-nin finalı Azərbaycanda keçiriləcək, bu da ölkənin texnologiyalar sahəsində nüfuzunu artıracaq.

N.Təbrizli