BTC kəməri ilə nəql edilən tranzit neftinin həcmi açıqlanıb

2025-ci ilin on bir ayında Azərbaycanın magistral neft kəmərləri ilə 33 milyon 408,9 min ton neft nəql edilib. Bu da 2024-cü ilin 11 ayı ilə müqayisədə 5,5 % azdır. Bu barədə Dövlət Statistika Komitəsi məlumat yayıb.

Ötən dövr ərzində nəqletmənin 74,6 %-i Bakı-Tbilisi-Ceyhan (BTC) neft ixrac kəməri ilə həyata keçirilib. Bu kəmər vasitəsilə yanvar-noyabr aylarında 24 milyon 907,4 min ton neft ötürülüb. Bu, 2024-cü ilin eyni ayları ilə müqayisədə 7,2 % azdır.

Hesabat dövründə BTC kəməri ilə nəql edilmiş neftin 85,1 %-ni və ya 21 milyon 199,8 min tonunu Azərbaycanda hasil edilən neft, 14,9 %-ini və ya 3 milyon 707,6 min tonunu isə Türkmənistan və Qazaxıstandan daxil olan neft təşkil edib.

Bu dövrdə BTC kəməri ilə nəql edilmiş Azərbaycan neftinin həcmi 3,4 %, Türkmənistan və Qazaxıstandan daxil olan neftin həcmi isə 24,2 % azalıb.

Azərbaycan təbii qazı “Şahdəniz” yatağından hasil edilərək Cənubi Qafqaz Boru Kəməri (Bakı–Tbilisi–Ərzurum) və TANAP vasitəsilə əvvəlcə Türkiyəyə, daha sonra Avropaya çatdırılır.

Bakı–Tbilisi–Ərzurum kəməri ilə ilk qaz 2007-ci ildə, TANAP vasitəsilə isə Türkiyəyə kommersiya qazının nəqlinə 2018-ci il iyunun 30-da başlanılıb.

Aytac Zeynalova