Azərbaycanın dövlət borcu azalıb - Maliyyə Nazirliyi

2025-ci ildə dövlət borcunun həcmi 1 milyard 392,7 milyon manat azalıb. Bu barədə Maliyyə Nazirliyindən bildirilib. 

Eyni zamanda, dövlət zəmanətli borclar üzrə də azalma qeydə alınıb – bu göstərici 589 milyon manat təşkil edib.

Dövlət istiqrazları üzrə orta ödəniş müddəti 2,2 dəfə artırılaraq 3,3 ilə çatdırılıb ki, bu da borcun daha uzunmüddətli və dayanıqlı şəkildə idarə olunmasına imkan verib.

Nazirliyin açıqlamasında qeyd olunur ki, borca xidmət xərclərinin optimallaşdırılması nəticəsində dövlət büdcəsində 300,1 milyon manat məbləğində qənaət əldə edilib.

Bununla yanaşı, vəsaitlərin səmərəli idarə olunması çərçivəsində Vahid Xəzinə Hesabının idarə edilməsi hesabına 121,3 milyon manat gəlir qazanılıb.

Rəsmi qurum vurğulayıb ki, əldə olunan nəticələr fiskal dayanıqlığın gücləndirilməsi və dövlət maliyyəsinin daha effektiv idarə olunması baxımından mühüm əhəmiyyət daşıyır.

Gülnar Nazimqızı