Azərbaycan Ermənistandan məhsul almağa başlayıb

2026-cı ilin ilk üç ayında Azərbaycan Ermənistandan məhdud həcmdə mal idxal edib. Bu barədə Dövlət Gömrük Komitəsinin mart blütenində qeyd olunub. 

Hesabat dövründə Ermənistandan idxalın həcmi cəmi 0,96 min ABŞ dolları təşkil edib və ümumi idxalda payı 0,00% səviyyəsində olub.

Eyni zamanda, Azərbaycan Ermənistan istiqamətində 5 757,48 min ABŞ dolları həcmində ixrac həyata keçirib ki, bu da ümumi ixracın 0,11%-ni təşkil edir.

Bundan əvvəl Ermənistanın iqtisadiyyat naziri Kevork Papoyan açıqlama vermişdi ki,  Azərbaycanda konkret məhsulların idxalında maraqlı olan şirkətlər mövcuddur. 

“Azərbaycan tərəfi onları maraqlandıran məhsulların siyahısını təqdim edib, biz isə ixrac edə biləcəyimiz həcmləri göndərmişik. Siyahıya həmçinin güllər və istixana məhsulları – pomidor, bibər də daxildir. Təxmini qiymət təklif etmişik”, – Papoyan bildirib.

Gülnar Nazimqızı