Gəmiqayırma Zavodu Qazaxıstan şirkəti ilə iki quru yük gəmisinin inşası üzrə müqavilə imzalayıb

Bakı Gəmiqayırma Zavodu ilə Qazaxıstanın Samruk-Kazına fonduna daxil olan “KTZ Express Shipping” şirkəti arasında gəmiqayırma sahəsində əməkdaşlıq müqaviləsi imzalanıb.

Razılaşmaya əsasən, beynəlxalq standartlara uyğun iki ədəd quru yük gəmisinin inşası nəzərdə tutulur.

“AZCON Holding”in icraçı direktoru Şahin Babayev bildirib ki, beynəlxalq tərəfdaşlarla əməkdaşlığın genişləndirilməsi şirkətin əsas prioritetlərindəndir və layihə Azərbaycanın gəmiqayırma sənayesinin inkişafı baxımından əhəmiyyətlidir.

“Samruk-Kazına”nın İdarə Heyətinin sədri Nurlan Jakupov isə qeyd edib ki, bu əməkdaşlıq Qazaxıstanın tranzit potensialının artırılması və Transxəzər marşrutunun dayanıqlığının gücləndirilməsi baxımından vacibdir.

Onun sözlərinə görə, layihə Orta Dəhliz üzrə yük axınının artdığı bir dövrdə həyata keçirilir və həm yükdaşıma imkanlarının genişlənməsinə, həm də beynəlxalq tərəfdaşların cəlbinə xidmət edəcək.

Məlumata görə, beynəlxalq sifarişlər əsasında inşa olunan gəmilərin ümumi sayı 4-ə çatıb ki, bu da zavodun qlobal bazarda mövqeyinin gücləndiyini göstərir.

Aytac