İsrail şirkətləri Azərbaycanın aqrar sektoruna dəstək verəcək

Azərbaycan Kənd Təsərrüfatı Nazirliyi yanında Aqrar Tədqiqatlar Mərkəzi İsrailin aqrotexnologiya sahəsində fəaliyyət göstərən “Agrigo AI Ltd.” və “Supplant Ltd.” şirkətləri ilə əməkdaşlığa dair memorandum imzalayıb.

Sənəd aqrar texnologiyalar, süni intellekt əsaslı həllər, ərzaq təhlükəsizliyi və kənd təsərrüfatı üzrə elmi-tədqiqat əməkdaşlığını əhatə edir. Memorandum çərçivəsində birgə elmi layihələr, rəqəmsal texnologiyaların tətbiqi, mütəxəssis mübadiləsi və təlim proqramlarının həyata keçirilməsi nəzərdə tutulur.

Azərbaycan və İsrail son illərdə kənd təsərrüfatı sahəsində əməkdaşlığı genişləndirir. Tərəflər suvarma texnologiyaları, toxumçuluq, heyvandarlıq və aqrar innovasiyalar sahəsində birgə layihələri müzakirə edir.

Kənd təsərrüfatı Azərbaycanın qeyri-neft iqtisadiyyatının əsas sahələrindən biri hesab olunur. Dövlət Statistika Komitəsinin məlumatına görə, ölkədə kənd təsərrüfatı torpaqları ümumi ərazinin təxminən 55%-ni təşkil edir.

N.Təbrizli