Huawei rəsmisi: Data mərkəzlərində yaşıl enerjidən istifadə sürətlə artır

Son illərdə data mərkəzlərinin enerji təminatında bərpa olunan enerji mənbələrinin rolu əhəmiyyətli dərəcədə artıb. Bunu Bakı Enerji Forumunda Huawei şirkətinin Baş Biznes İnkişaf Meneceri Cavid Alifli bildirib.

Onun sözlərinə görə, ABŞ-da 2020-ci ildə yaşıl enerji data mərkəzlərinin elektrik tələbatının cəmi 20%-ni qarşılayırdısa, 2024-cü ildə bu göstərici 24%-ə yüksəlib. Sonrakı dövrdə artım daha da sürətlənərək 2026-cı ildə 33%-ə çatıb.

“Cəmi bir neçə il ərzində yaşıl enerjinin data mərkəzlərinin enerji təminatındakı payı nəzərəçarpacaq dərəcədə artıb. Bu tendensiya davam edir və göstəricilər hər ay yüksəlir”, – Alifli deyib.

Huawei rəsmisi qeyd edib ki, əvvəllər bu prosesin ləng getməsinin əsas səbəbi bərpa olunan enerji mənbələrinin data mərkəzlərinə inteqrasiyası üçün zəruri texnoloji həllərin kifayət qədər inkişaf etməməsi idi.

Onun sözlərinə görə, hazırda batareya enerji saxlama sistemləri, ağıllı şəbəkələr və müasir invertor texnologiyaları günəş və külək enerjisinin data mərkəzlərinə fasiləsiz inteqrasiyasını təmin edir.

“Bu texnologiyalar sayəsində data mərkəzləri ehtiyat enerji mənbələri kimi dizel generatorlarından daha az istifadə edir və enerji təchizatının etibarlılığı artır”, – o vurğulayıb.

Alifli əlavə edib ki, süni intellekt və rəqəmsal xidmətlərə tələbatın artması fonunda enerji səmərəliliyi və yaşıl enerji həlləri data mərkəzlərinin inkişafında əsas istiqamətlərdən birinə çevrilir.

Gülnar Nazimqızı