Mərkəzi Bank 2027-2030-cu illər üçün yeni strategiya hazırlayır

Azərbaycan Mərkəzi Bankı maliyyə sektorunun inkişafı üzrə 2027-2030-cu illəri əhatə edəcək yeni strategiya hazırlayır.

Mərkəzi Bankın Maliyyə Texnologiyaları və İnnovasiyalar Departamentinin direktoru Fidan Tofidi bildirib ki, hazırda qüvvədə olan üçillik strategiyanın son ili icra olunur və növbəti strateji dövr üzrə hazırlıq işləri aparılır.

Onun sözlərinə görə, yeni strategiyanın əsas istiqamətlərindən biri rəqəmsallaşma və maliyyə sektorunda süni intellekt texnologiyalarının tətbiqinin genişləndirilməsi olacaq.

“Dünya artıq rəqəmsallaşma mərhələsini keçir və süni intellektin tətbiqinə doğru irəliləyir. Bizim vəzifəmiz maliyyə institutlarının rəqəmsallaşma səviyyəsini artırmaq və süni intellekt həllərinin tətbiqini təşviq etməkdir”, - Tofidi deyib.

O bildirib ki, Mərkəzi Bank maliyyə sektorunun rəqəmsal yetkinlik səviyyəsini qiymətləndirib və bank, sığorta, fintech və kapital bazarları üzrə ilkin nəticələr əldə edib.

Tofidinin sözlərinə görə, yeni strategiya ilk dəfə olaraq maliyyə sektorundan toplanmış real məlumatlar və göstəricilər əsasında hazırlanacaq.

N.Təbrizli