ADY Bakı–Tbilisi qatarına biletlərin 90 gün əvvəl satışını açmağa hazırlaşır

Azərbaycan Dəmir Yolları Bakı–Tbilisi–Bakı qatarına biletlərin səfər tarixindən 90 gün əvvəl satışa çıxarılması üzərində işləyir, ADY-nin Sərnişin Daşımaları Departamentinin rəisi Azər Fərəcov bildirib.

Onun sözlərinə görə, hazırda biletlər satışa 30 gün əvvəl çıxarılır.

“90 gün əvvələ satışın açılması üçün tərəfimizdən müəyyən işlər aparılır. İşlər tam yekunlaşandan sonra bununla bağlı açıqlama veriləcək”, — Fərəcov deyib.

O qeyd edib ki, qatarın tərkibinə əlavə ediləcək yeni vaqonlar ölkə daxilində istifadə olunan yataq tipli vaqonlardır. Hər vaqonda 36 yer var və hər sərnişin özü ilə ödənişsiz 36 kiloqramadək yük daşıya biləcək.

Fərəcov bildirib ki, sərnişinlərin rahatlığı üçün həmin vaqonlarda səyyar qida satışı da təşkil olunacaq.

ADY rəsmisi Bakı–Tbilisi istiqamətində gündüz reysləri üçün oturaq tipli qatarların gətirilməsi ilə bağlı hazırda hər hansı iş aparılmadığını deyib.

“Hazırda yalnız bir qatar hərəkətdədir və həmin qatarın tərkibinə əlavə vaqonların qoşulması ilə bağlı işlər aparılır”, — Fərəcov bildirib.