Kamran Əsədovun məhkəməsində yeni vəsatətlər verilib

Gəncə Şəhər Məhkəməsində buraxılış və qəbul imtahanlarına qanunsuz texniki vasitələrin keçirilməsində təqsirləndirilən təhsil eksperti Kamran Əsədovun cinayət işi üzrə növbəti məhkəmə iclası keçirilib.

Hakim Elçin Məmmədovun sədrliyi ilə keçirilən prosesdə zərərçəkmiş şəxslər vəsatət verərək hazırlıq kursunda dərs deyən müəllimlərlə bağlı intizam tədbirlərinin görülməsini istəyiblər.

Məhkəmə Gündüz Abbasovun vəzifəli şəxs olub-olmamasının müəyyənləşdirilməsi üçün İqtisadiyyat Nazirliyi yanında Dövlət Vergi Xidmətinə sorğu göndərilməsi barədə qərar qəbul edib.

Proses zamanı Kamran Əsədov cinayət işinə xitam verilməsini istəyib. Onun vəkili Bəxtiyar Muradov isə bəzi xəbər saytlarında məhkəmə prosesi ilə bağlı həqiqətə uyğun olmayan məlumatların yayıldığını bildirərək bununla bağlı tədbir görülməsini xahiş edib.

Məhkəmə vəsatətlərə növbəti iclasda münasibət bildirəcəyini açıqlayıb. Növbəti proses avqustun 20-nə təyin edilib.

 İş üzrə Baş Prokurorluğun yaydığı məlumata əsasən, Dövlət İmtahan Mərkəzindən daxil olan məlumat əsasında ali məktəblərə qəbul və buraxılış imtahanlarında iştirak edən şəxslərə qanunsuz köməklik göstərilməsi ilə bağlı cinayət işi başlanıb.

İbtidai istintaq zamanı Gündüz Abbasovun təşkil etdiyi hazırlıq kursunun şagird və abituriyentlərinə imtahan zamanı köməklik göstərmək üçün gizli informasiya əldə etməyə imkan verən texniki vasitələr hazırladığı və Kamran Əsədovla birlikdə həmin vasitələri ümumilikdə 11 nəfərin üzərinə yerləşdirdiyi müəyyən edilib.

İstintaq həmçinin Sumqayıtda Sənan Hüseynovun xüsusi icazə olmadan gizli informasiya əldə etmək üçün nəzərdə tutulan 31 ədəd texniki vasitəni satmasına əsaslı şübhələr müəyyən edib.

Gündüz Abbasova Cinayət Məcəlləsinin 302.3 və 308.1-ci, Kamran Əsədova 302.3 və 32.5, 308.1-ci, Sənan Hüseynova isə 302.3-cü maddələri ilə ittiham elan edilib.

Gündüz Abbasov barəsində həbs, digər təqsirləndirilən şəxslər barəsində isə həbslə bağlı olmayan qətimkan tədbiri seçilib. Cinayət işləri üzrə ibtidai istintaq başa çatdırılaraq məhkəməyə göndərilib.

Aytac Zeynalova