SOCAR Türkiyədəki "Petkim" kompleksinə yeni investisiyalar yatırmağı planlaşdırır

Azərbaycan Respublikası Dövlət Neft Şirkəti (SOCAR) istehsal gücünü və rəqabət qabiliyyətini artırmaq məqsədilə Türkiyədəki "Petkim" neft-kimya kompleksinə yeni investisiyalar yönəltməyi planlaşdırır. Bu barədə cümə günü Bakıda keçirilən Azərbaycan-Türkiyə V Enerji Forumunda çıxış edən SOCAR-ın prezidenti Rövşən Nəcəf bildirib.

R.Nəcəf yeni sərmayələrin "Petkim"in baş inkişaf planı (master-plan) çərçivəsində nəzərdə tutulduğunu qeyd etsə də, gözlənilən maliyyə həcmi, icra qrafiki və güc artımı parametrlərini açıqlamayıb. Türkiyənin ən böyük xarici investoru olan SOCAR "Petkim"ə nəzarət etməklə yanaşı, qardaş ölkənin neft emalı, təbii qaz və elektroenergetika sektorlarında mövqelərini ardıcıl olaraq möhkəmləndirir.

SOCAR rəhbəri, həmçinin şirkətin Türkiyənin BOTAŞ dövlət boru kəmərləri şirkəti ilə hər iki ölkənin hüdudlarından kənarda birgə layihələr və əməkdaşlıq imkanlarını nəzərdən keçirdiyini diqqətə çatdırıb. O xatırladıb ki, iyun ayında BOTAŞ ilə Azərbaycanın "Abşeron" qaz yatağının tərəfdaşları arasında tammiqyaslı işlənmə mərhələsində hasil ediləcək qazın 50%-nin 15 il müddətində Türkiyəyə ixracını nəzərdə tutan saziş imzalanıb.

SOCAR-ın Türkiyənin elektrik enerjisi bazarına daxil olduğunu da vurğulayan Nəcəf cari ilin əvvəlində 870 meqavat gücündə qaz elektrik stansiyasının alındığını və bununla da qazdan elektrik enerjisinə qədər uzanan zəncirin tamamlandığını əlavə edib.

N.Təbrizli