Layihənin açılış mərasimində layihənin rəhbəri, PR menecer Türkan Nadirqızı çıxış edərək tədbiri açıq elan edib. Layihənin önəmindən danışaraq, jurnalistlər üçün əhəmiyyətini vurğulayıb: 

 

"Layihə ekstremal şəraitdə işləyən jurnalistlərin özünü qoruması, düzgün informasiya alıb cəmiyyətə çatdırılmasının öyrədilməsi məqsədi daşıyır. Layihə çərçivəsində müxtəlif media orqanlarında fəaliyyət göstərən 25 gənc jurnalistin "Son dövrün ekstremal jurnalistika təcrübəsi”, "Müxbirin ekstremal şəraitdə davranış metodları”, "Müharibə jurnalistikasının qaydaları ilə bağlı nəzəri və praktiki bilikləri” artırılacaq”.

 

"Layihənin əsas məqsədi hərbi sahəni işıqlandırmağın hüquqi-təcrübi-psixoloji normalarına, ekstremal jurnalistikanın qaydalar bazasının yaradılmasına, cəbhədən xəbərlər yayan jurnalistlərin peşəkarlığının artırılmasına yardım etməkdir. Eyni zamanda, məqsədimiz mediada milli təhlükəsizliyə xələl gətirən informasiyaların yayılmasının qarşısının alınmasıdır”, - deyə layihə rəhbəri bildirib. 

 

Ayşə Məhərrəmova gənc jurnalistlərə dəstək məqsədilə belə təşəbbüslərin reallaşdırılmasının önəmini vurğulayıb.

Mayor Rəşid Faxralı hərbi jurnalistikanın önəmindən, jurnalistlərlə Müdafiə Nazirliyinin əməkdaşlığından bəhs edib. 

 

Layihənin baş operatoru Taleh Valehov çıxış edərək öz təəssüratlarını bölüşüb, çəkiliş zamanı yaşananlardan söz açıb.

Sonda layihə çərçivəsində iştirakçılar üçün növbəti video-çarxın təqdimatı keçirildi.

 

Qeyd edək ki, "Həyəcan siqnalı 2” layihəsi Azərbaycan Respublikasının Prezidentinin yanında Gənclər Fondunun maliyyə dəstəyi, Müdafiə Nazirliyinin, Mətbuat Şurasının, Sağlam Düşüncə Gənclər Təşkilatının təşkilati dəstəyiylə 9 – 12 dekabr Bakı şəhərində keçirilir.