İstanbulda möhtəşəm konsert:140 mindən çox sənətsevər bir araya gəldi — VİDEO/FOTOLAR

Qlobal miqyasda nüfuzunu daha da gücləndirən İstanbul 2026-cı ilin may ayında ardıcıl olaraq bir sıra mühüm beynəlxalq mədəniyyət və idman tədbirlərinə ev sahibliyi edib. Cəmi on gün ərzində keçirilən bu tədbirlər şəhərin beynəlxalq tədbirlər məkanı kimi mövqeyini bir daha təsdiqləyib.

Mayın 20-də baş tutan UEFA Avropa Liqasının final oyunu İstanbulun ev sahibliyi etdiyi önəmli beynəlxalq tədbirlərdən biri olsa da, mayın 30-da şəhərdə keçirilən iki möhtəşəm stadion konserti xüsusilə diqqət çəkib. Həmin gün İstanbulun Atatürk Olimpiya Stadionunda dünya şöhrətli musiqiçi Kanye Westin Avropa turnesinin açılış konserti, Beşiktaş Park Stadionunda isə əfsanəvi tenor Andrea Bocellinin möhtəşəm çıxışı təşkil olunub.

Bu iki mötəbər tədbir Avropa, Yaxın Şərq, Mərkəzi Asiya və digər regionlardan gələn 140 mindən çox sənətsevəri İstanbulda bir araya gətirib.

Kanye West uzun müddətdir gözlənilən Avropa turnesinə məhz İstanbuldan start verib. Türkiyədə ilk dəfə səhnəyə çıxan sənətçinin konserti Böyük Britaniya, Almaniya, Fransa, Niderland, İtaliya, Rusiya, Polşa və Körfəz ölkələrindən on minlərlə tamaşaçını şəhərə cəlb edib. Konsert eyni zamanda sənətçinin rəsmi YouTube kanalı vasitəsilə canlı yayımlanaraq milyonlarla izləyiciyə çatdırılıb.

İstanbul üçün xüsusi hazırlanmış proqram, möhtəşəm səhnə quruluşu və təsirli vizual effektlərlə müşayiət olunan çıxış tamaşaçılar tərəfindən böyük maraqla qarşılanıb. 118 min nəfərlik auditoriya ilə bu tədbir son illərin ən böyük stadion konsertlərindən biri kimi tarixə düşüb və İstanbulun dünya səviyyəli əyləncə layihələrini qəbul etmək və uğurla təşkil etmək potensialını bir daha nümayiş etdirib.

Həmin axşam əfsanəvi tenor Andrea Bocelli də "Romanza – 30th Anniversary World Tour” dünya turnesi çərçivəsində İstanbul səhnəsinə çıxıb. Beşiktaş Park Stadionunda keçirilən konserti 22 min tamaşaçı izləyib. Beləliklə, eyni gecədə təşkil olunan hər iki konsert ümumilikdə 140 minə yaxın musiqisevəri İstanbulda bir araya gətirib.

İstanbulun qlobal mədəniyyət və idman mərkəzi kimi yüksəlişi 2026-cı il boyunca davam edəcək. Musiqi ilə yadda qalan bu möhtəşəm gecədən sonra şəhər zəngin beynəlxalq tədbirlər təqviminə ev sahibliyi etməyə hazırlaşır. İyun ayında Scorpions, Pet Shop Boys, Megadeth, Alice Cooper, Tom Odell və Manowar, iyulda Gorillaz və Ricky Martin, sentyabrda isə Black Coffee, LP və The Black Keys İstanbul səhnəsində çıxış edəcəklər.

Şəhərin beynəlxalq cazibəsini artıran mühüm idman tədbirləri də il ərzində davam edəcək. Avqust ayında Bosfor boğazında qitələrarası üzgüçülük yarışı, avqust-sentyabr aylarında 2026-cı il Qadınlar arasında Avropa Voleybol Çempionatı keçiriləcək. Sentyabrda Tour of İstanbul veloyarışı və Tour de France layihəsinin tərkib hissəsi olan L’Étape Türkiye təşkil olunacaq. Oktyabr-noyabr aylarında isə Prezident Beynəlxalq Yaxta Yarışı idmansevərlərin diqqət mərkəzində olacaq.

Beynəlxalq media tərəfindən geniş işıqlandırılan bu cür mötəbər tədbirlər İstanbulun həm aparıcı turizm istiqaməti, həm də qlobal idman, mədəniyyət və əyləncə mərkəzi kimi nüfuzunu daha da gücləndirib.

Qısa müddət ərzində bir neçə irimiqyaslı beynəlxalq tədbirə uğurla ev sahibliyi etməsi və eyni zamanda yüz minlərlə xarici qonağı qəbul etməsi şəhərin inkişaf etmiş tədbir infrastrukturu, geniş nəqliyyat əlaqələri və yüksək qonaqpərvərlik imkanlarını bir daha nümayiş etdirib.

Dünyanın ən çox ziyarət olunan şəhərlərindən biri olan və Avropa ilə Asiyanı birləşdirən İstanbul müasir tədbir məkanlarını zəngin tarixi-mədəni irs və dinamik şəhər həyatı ilə bir araya gətirir. Beynəlxalq tədbirlərin keçirilməsi üçün zəruri olan əlçatanlıq və infrastruktur imkanları isə şəhərin üstünlüklərini daha da artırır.

Son illərdə məhz bu miqyaslı tədbirlər sayəsində İstanbul yeni auditoriyaların diqqətini cəlb edir və dünyanın ən cəlbedici səyahət və tədbir istiqamətlərindən biri kimi mövqeyini daha da möhkəmləndirir.