Azərbaycanın seçdiyi yol digər postsovet ölkələri üçün də nümunəyə çevrilib - Fazil Mustafa

İşğal altında olan torpaqların azad olunması, ardınca Vaşinqtonda keçirilən sammitdə əldə edilən razılaşma Azərbaycanın nüfuzunun təsdiqi kimi dəyərləndirilməlidir.  Bunu  Milli Məclisin iclasında deputat Fazil Mustafa bildirib. 

“Vaşinqton Anlaşması həm Azərbaycanın gücünü, həm də onun beynəlxalq əhəmiyyətini göstərən bir tablodur,” — deputat vurğulayıb.

Fazil Mustafa əlavə edib ki, Azərbaycanın seçdiyi yol digər postsovet ölkələri üçün də nümunəyə çevrilib. 

“Gürcüstan, Moldova, Ukrayna illər boyu beynəlxalq təşkilatlara üz tutaraq işğal problemini həll etməyə çalışsalar da, nəticə əldə etmədilər. Azərbaycan isə öz gücü və iradəsi ilə torpaqlarını azad etdi,” — o bildirib.

Deputat qeyd edib ki, Prezident İlham Əliyev həm Ermənistan rəhbərliyi, həm də xalqı üçün yeni imkanların yolunu göstərib. 

“Ermənistan tranzit ölkəyə çevrilə bilər, lakin yalnız Azərbaycan vasitəsilə. Bu, onların iqtisadi rifahına da töhfə verəcək,” — Mustafa qeyd edib.

Onun sözlərinə görə, Azərbaycanın qarşısında yeni strateji hədəf bütöv Azərbaycanın reallaşdırılmasıdır:.

“Naxçıvan və digər istiqamətlər üzrə kommunikasiyaların açılması bütöv Azərbaycanın uğuru deməkdir.”

N.Təbrizli