Daxili qoşunların məsuliyyəti və fəaliyyətinə nəzarət məsələləri qanunla müəyyən edilir

Milli Məclisdə müzakirəyə çıxarılan “Azərbaycan Respublikasının daxili qoşunları haqqında” yeni qanun layihəsi daxili qoşunların şəxsi heyətinin məsuliyyətini və fəaliyyətinə nəzarət mexanizmlərini dəqiq şəkildə müəyyən edir.

Layihəyə əsasən, daxili qoşunların hərbi qulluqçuları və mülki işçiləri intizam, inzibati və cinayət məsuliyyətini müvafiq olaraq ölkənin hərbi nizamnamələri, İnzibati Xətalar və Cinayət məcəllələri çərçivəsində daşıyacaqlar. Dövlətə vurulan ziyana görə maddi məsuliyyət isə ayrıca qanunla tənzimlənəcək.

Xidməti vəzifələrin icrası zamanı son zərurət və zəruri müdafiə hallarında vurulan ziyana görə mülki məsuliyyət məsələləri isə Mülki Məcəlləyə uyğun həyata keçiriləcək.

Yeni qanun layihəsində daxili qoşunların fəaliyyətinə nəzarət məsələləri də açıq şəkildə göstərilib. Ümumi nəzarət Ali Baş Komandana, idarədaxili nəzarət isə aidiyyəti icra hakimiyyəti orqanı və qoşunların komandanlığına həvalə olunur. Hüquqazidd əməllərə isə prokurorluq nəzarət edəcək.

Layihəyə görə, hərbi qulluqçunun törətdiyi hüquqazidd əməl barədə məlumat 24 saat ərzində prokurora təqdim edilməlidir.

Qanun qüvvəyə mindikdən sonra “Daxili qoşunların statusu haqqında” 1994-cü il qanunu qüvvədən düşəcək.

Gülnar Nazimqızı