Bağırov: Hüquqşünas qadınlar yüksək nəticə göstərsə də, praktik fəaliyyətdən uzaqdır

Azərbaycanda hüquq təhsili alan qadınların akademik göstəriciləri yüksək olsa da, onların əhəmiyyətli hissəsi sonradan peşə fəaliyyətindən kənarda qalır və bu, hüquq sistemi üçün ciddi itki yaradır. Bunu Azərbaycan Vəkillər Kollegiyasının sədri Anar Bağırov bildirib.

Bağırovun sözlərinə görə, son illər qadın vəkillərin sayı artsa da, hazırda onların payı təxminən 22% təşkil edir.

“Ali təhsil pilləsində ən yüksək nəticə göstərən hüquqşünasların əksəriyyəti qadınlardır. Lakin müxtəlif sosial və institusional səbəblərdən onların böyük hissəsi praktik hüquq fəaliyyətinə qoşulmur,” – o deyib.

Bağırov bildirib ki, Vəkillər Kollegiyası analıq və sosial məzuniyyət mexanizmlərini tətbiq edir və bu yanaşma digər hüquq institutlarında da əsas prinsip olmalıdır.

Vəkillər Kollegiyasının sədri hüquq fakültələrini bitirən məzunların bilik və praktiki hazırlıq səviyyəsinin qənaətbəxş olmadığını qeyd edib. 

Onun sözlərinə görə, məhkəmə sənədlərinin hazırlanması, hüquqi arqumentasiya və yazı mədəniyyəti ciddi problemlər yaradır.

“Nəzəri biliklə praktiki bacarıqlar arasında balans yoxdur. Bu isə məhkəmə proseslərinin keyfiyyətinə birbaşa təsir edir,” – Bağırov deyib.

Bağırov Azərbaycanda hüquqi xidmətlər bazarının tənzimlənmədiyini vurğulayaraq bildirib ki, bir sıra ölkələrdən fərqli olaraq, hüquqi xidmət göstərmək üçün vahid lisenziya və sertifikat tələbləri mövcud deyil.

O, həmçinin keyfiyyətsiz xarici ali məktəblərdən alınan diplomların tanınmasının peşənin nüfuzuna zərər vurduğunu qeyd edib.

Bağırov hüquq fakültələrində müəllimlərin əməkhaqqının aşağı olmasını və Ədliyyə Akademiyasının maddi-texniki bazasının zəifliyini hüquq təhsilinin əsas struktur problemləri kimi göstərib.

“Hüquq fakültələri universitetlərin əsas gəlir mənbələrindən biridir, lakin bu, tədrisin keyfiyyətində əksini tapmır,” – o bildirib.

N.Təbrizli