Əliyev IPU baş katibi ilə görüşdə Azərbaycan-Ermənistan arasında iqtisadi əlaqələrin başladığını bildirib

 İlham Əliyev bazar ertəsi Parlamentlərarası İttifaq Baş katibi Martin Chungong ilə görüşündə Azərbaycan və Ermənistan arasında sülh prosesi çərçivəsində artıq iqtisadi-ticari münasibətlərin başladığını və tranzit məhdudiyyətlərinin aradan qaldırıldığını bildirib.

Görüş zamanı Martin Çunqonq Azərbaycanla Ermənistan arasında sülh gündəliyində əldə olunan nailiyyətlər, eləcə də ölkənin ərazi bütövlüyünün və suverenliyinin tam bərpası münasibətilə Prezident İlham Əliyevi təbrik edib. Dövlət başçısı təbriklərə görə minnətdarlığını ifadə edib.

Prezident qeyd edib ki, Vaşinqtonda əldə olunan razılaşmalar fonunda iki ölkə arasında iqtisadi-ticari əlaqələrə start verilib və Azərbaycan birtərəfli qaydada Ermənistana gedən tranzit yüklər üzrə məhdudiyyətləri aradan qaldırıb.

Tərəflər Prezident Əliyevin Avropa Siyasi Birliyinin 8-ci Zirvə toplantısındə videobağlantı vasitəsilə iştirakını münasibətlərin normallaşması istiqamətində mühüm addım kimi qiymətləndiriblər.

Dövlət başçısı Parlamentlərarası İttifaqın Azərbaycan və Ermənistan parlamentləri arasında dialoqun təşviqində, o cümlədən parlament sədrləri səviyyəsində görüşlərin təşkilində rolunu müsbət dəyərləndirib.

Görüşdə, həmçinin, işğaldan azad olunmuş ərazilərdə aparılan bərpa işləri və mina təhlükəsinin mülki əhali və yenidənqurma prosesinə təsiri müzakirə olunub.

Tərəflər Azərbaycan ilə Parlamentlərarası İttifaq arasında əməkdaşlığın mövcud vəziyyəti və parlamentlərarası dialoqun inkişaf perspektivləri ətrafında fikir mübadiləsi aparıblar.