Azərbaycanda sosial şəbəkə alqoritmlərinə nəzarətin artırılması təklif olunur

Azərbaycanda sosial şəbəkələrin radikallaşma və cəmiyyətdə qütbləşməni gücləndirən alqoritmlərinə nəzarətin artırılması üçün qanunvericiliyin Avropa İttifaqının təcrübəsi əsasında təkmilləşdirilməsi təklif olunur. Bunu deputat Sahib Alıyev Milli Məclisdə çıxışı zamanı deyib.

Onun sözlərinə görə, “Meta”, “X”, “YouTube”, “Google” və digər texnologiya platformalarının alqoritmləri istifadəçilərin diqqətini daha çox cəlb edən qıcıqlandırıcı və aqressiv paylaşımları süni şəkildə önə çıxarır.

“İnsan beyni neqativ, qorxulu və hədəf göstərən xəbərlərə müsbət məzmundan daha həssas reaksiya verdiyindən, alqoritmlər cəmiyyəti qütbləşdirən, qıcıqlandırıcı və aqressiv postları süni şəkildə önə çıxarır”, - o bildirib. 

Deputat bildirib ki, istifadəçinin müəyyən məzmuna maraq göstərdiyi aşkarlandıqda platformalar ona daha kəskin və baxışlarına uyğun paylaşımlar təqdim edir. Bu isə insanların alternativ fikirlərdən təcrid olunmasına, radikal mövqelərin güclənməsinə və cəmiyyətin qarşıdurma cəbhələrinə bölünməsinə səbəb olur.

Sahib Alıyev bot şəbəkələri və trollar vasitəsilə müəyyən fikirlərin süni şəkildə trendə çevrildiyini də qeyd edib.

O, Avropa İttifaqının Rəqəmsal Xidmətlər Aktının sosial qütbləşməni və radikallaşmanı stimullaşdıran alqoritmlərə qarşı konkret tələblər müəyyən etdiyini bildirib. Deputat xüsusilə sənədin 27, 34, 35, 38 və 40-cı maddələrinə istinad edib.

Sahib Alıyev, həmçinin Milli Məclisin komitələrinə fəaliyyət istiqamətlərinə aid məsələlərlə bağlı ayrıca bəyanat yaymaq səlahiyyətinin verilməsi üçün qanunvericiliyə dəyişiklik edilməsini təklif edib.

Gülnar Nazimqızı