Milli Məclis 27 Sentyabr - Anım Günü ilə bağlı bəyanat qəbul edib

Milli Məclis sentyabrın 30-da keçirilən plenar iclasında 27 Sentyabr – Anım Günü ilə bağlı bəyanat qəbul edib.

Sənəddə 27 sentyabr Azərbaycanın ərazi bütövlüyünün bərpasına və dövlətin suveren hüquqlarının bütün ölkə ərazisində təmin edilməsinə aparan prosesin başlanğıcı, eləcə də milli birliyin rəmzi kimi qiymətləndirilib.

Bəyanatda 2020-ci il sentyabrın 27-də başlayan və 44 gün davam edən Vətən müharibəsinin Azərbaycanın tarixində dönüş mərhələsi olduğu bildirilib.

Qeyd olunub ki, Azərbaycan BMT Təhlükəsizlik Şurasının işğal olunmuş ərazilərin azad edilməsini tələb edən dörd qətnaməsinin icrasını öz gücü ilə təmin edib.

Sənəddə 2023-cü il sentyabrın 19–20-də keçirilmiş birgünlük antiterror tədbirlərinin 44 günlük müharibədə əldə edilmiş qələbənin davamı olduğu və nəticədə Azərbaycanın bütün ərazisində suverenliyinin bərpa edildiyi vurğulanıb.

Milli Məclis 27 Sentyabr – Anım Günü, 8 Noyabr – Zəfər Günü və 20 Sentyabr – Dövlət Suverenliyi Gününün mahiyyətcə bir-birini tamamladığını bildirib.

Bəyanatda, həmçinin 2020-ci ildə Ermənistan silahlı qüvvələrinin cəbhə xəttindən uzaqda yerləşən Azərbaycan şəhər və rayonlarına hücumları nəticəsində 100-dən çox mülki şəxsin, o cümlədən 11 uşağın öldüyü, 450-dən çox insanın yaralandığı qeyd olunub.

Parlament şəhidlərin xatirəsinə ehtiramını bildirib, müharibədə iştirak etmiş əsgər və zabitlərə minnətdarlığını ifadə edib.

“Azad, güclü, vahid və suveren Azərbaycan şəhidlərimizə ən böyük abidədir”, – bəyanatda deyilir.