Xəzərin dayazlaşması Orta Dəhliz üçün ciddi çağırış yarada bilər-Oşakbayev

Xəzər dənizində su səviyyəsinin azalması və dayazlaşma prosesi Orta Dəhlizin uzunmüddətli dayanıqlılığı və daşımaların maya dəyəri üçün ciddi çağırış yarada bilər. Bunu TALAP Tətbiqi Araşdırmalar Mərkəzinin direktoru və CAMCA Şəbəkəsinin Qazaxıstan üzrə üzvü Rəhim Oşakbayev Bakıda keçirilən CAMCA Regional Forumunda deyib.

Onun sözlərinə görə, 2001-ci ildən Xəzərin şimal hissəsində sahil xətti 56 kilometrədək geri çəkilib, son beş ildə isə suyun dayazlaşması ildə təxminən 30 santimetrə çatıb.

“Əgər bu proses davam edərsə, Orta Dəhlizin dayanıqlılığı və fəaliyyət xərcləri region ölkələri üçün böyük çağırış ola bilər”, -  Oşakbayev bildirib.

O qeyd edib ki, son iki ildə Orta Dəhliz üzrə yükdaşımaların həcmi 2,3 dəfədən çox artıb. Bununla belə, Çin və Avropa arasında quru yolu ilə daşınan yüklərin təxminən 88%-i hələ də Rusiya, Belarus və Polşadan keçən marşrutla həyata keçirilir.

Oşakbayev Orta Dəhlizin Qazaxıstan üçün nəqliyyat marşrutlarının şaxələndirilməsi baxımından mühüm əhəmiyyət daşıdığını və onun uzunmüddətli dayanıqlılığının təmin edilməsinin vacib olduğunu vurğulayıb.

Aytac