İlham Əliyev müddətsiz partiya sədri olacaq

 Yeni Azərbaycan Partiyasının (YAP) sədrinin 5 illik səlahiyyət müddətinə dair müddəanın Nizamnamədən çıxarılması təklif olunur.

APA-nın məlumatına görə, bunu YAP Təftiş Komissiyasının üzvü, deputat Nizami Səfərov partiyanın VIII Qurultayında Nizamnaməyə təklif olunan dəyişikliklərin müzakirəsi zamanı deyib.

Onun sözlərinə görə, hazırda qüvvədə olan Nizamnaməyə əsasən, YAP sədrinin səlahiyyət müddəti beş ildir və müddət başa çatdıqda sədr Qurultay tərəfindən yenidən seçilə bilər.

Nizami Səfərov bildirib ki, bu müddəanın aradan qaldırılması təklif olunur.

“Bu, tamamilə qanunauyğun, siyasi və hüquqi reallıqları əks etdirən, Azərbaycanın misli görünməmiş zəfərlərinin rəhbəri, YAP sədri Prezident İlham Əliyevin müddətsiz mütəşəkkil qüvvə olan YAP-a rəhbərlik etməsi bizi yeni uğurlara və böyük qələbələrə aparacaq”, - deyə deputat bildirib.

YAP-ın 2021-ci ildə qəbul edilmiş hazırkı Nizamnaməsinə əsasən, partiya sədrinin səlahiyyət müddəti beş ildir və sədr Qurultay tərəfindən yenidən seçilə bilər. Həmin Nizamnamədə partiya sədrinin seçilməsi Qurultayın müstəsna səlahiyyətləri sırasında göstərilir.

YAP-ın VIII Qurultayı oktyabrın 2-də Bakıda keçirilir. Partiyanın əvvəlki, VII Qurultayı 2021-ci il martın 5-də keçirilib.