Özbəkistan süni intellektdən məsuliyyətli istifadə üzrə Asiya təşəbbüsü irəli sürüb

Özbəkistan texnoloji etimad və süni intellektdən məsuliyyətli istifadə üzrə Asiya təşəbbüsünü irəli sürüb. Bunu ölkə Prezidenti Şavkat Mirziyoyev Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Zirvə görüşündə bildirib.

“Rəqəmsal tərəqqinin bütün ölkələrə fayda gətirməsi və texnoloji inkişaf fərqlərinin azalması üçün əlimizdən gələni etməliyik”, — Mirziyoyev deyib.

O, təşəbbüsü irəli aparmaq üçün AQEM çərçivəsində ekspert platforması yaratmağı təklif edib. Bu platformada üzv dövlətlərin mütəxəssisləri tövsiyələr hazırlaya və praktiki tədbirləri əlaqələndirə bilərlər.

Mirziyoyev süni intellektin geniş imkanlar açdığını, eyni zamanda ciddi risklər yaratdığını bildirib. O, təşəbbüsün həyata keçirilməsi mexanizmlərini və müddətini açıqlamayıb.

Özbəkistan Prezidenti həmçinin münaqişələrin qarşısının alınmasına, dövlətlər arasında əlaqələrin və əməkdaşlığın genişləndirilməsinə yönəlmiş Asiyada etimad infrastrukturunun formalaşdırılması konsepsiyasını hazırlamağı təklif edib.

“Dialoq zəifləyəndə yanlış qərarların qəbul edilməsi riski artır. Buna görə də siyasi fikir ayrılıqlarının silahlı qarşıdurmaya çevrilməməsi üçün əlimizdən gələni etməliyik”, — o vurğulayıb.

Mirziyoyevin digər təklifləri arasında suya qənaət texnologiyalarının tətbiqi, yaşıl energetikanın inkişafı və ətraf mühitin monitorinqi üçün iqlim dayanıqlılığı üzrə tərəfdaşlığın yaradılması da yer alıb.

O, Özbəkistanın gələn il insan potensialının inkişafı üzrə forum keçirməyə hazır olduğunu bildirib və bu sahədə AQEM-in ikiillik fəaliyyət proqramını hazırlamağı təklif edib.

Mirziyoyev Azərbaycan nümayəndəsinin AQEM-in Baş katibi vəzifəsinə namizədliyini dəstəkləyib və Bakının sədrliyi 2028-ci ilədək davam etdirmək niyyətini alqışlayıb.
 

Gülnar Nazimqızı