Türkmənistandan maye qazın ilk partiyası Pakistana çatdırılıb

Mayeləşdirilmiş təbii qazın ilk partiyası Əfqanıstan vasitəsilə Türkmənistandan Pakistana çatdırılıb.

"Yeni Şafak”ın BNN Breaking xəbər şəbəkəsinə istinadən verdiyi məlumata görə, Əfqanıstanın cənubundakı Qəndəhar vilayətindən keçən qaz Çaman sərhəd-keçid məntəqəsinə gəlib.

Pakistan yerli ehtiyatların sürətlə tükəndiyi üçün ciddi qaz çatışmazlığı ilə üzləşib. Üstəlik, maye qazın bazar qiymətləri artıb və xüsusilə qışda ölkə üçün qəbuledilməz olub.

Türkmənistandan Əfqanıstan vasitəsilə qaz nəqli Mərkəzi Asiyanı Pakistanın Ərəb dənizindəki Qvadar limanı ilə birləşdirən yeni ticarət marşrutunun yaradılmasına yönəlmiş pilot layihənin bir hissəsidir. Layihənin qaz idxalı mənbələrini diversifikasiya etməklə Pakistanın enerji təhlükəsizliyinə töhfə verəcəyi gözlənilir.


www.anews.az