Əliyev -bir gün də istirahət etmədik

Azərbaycan 2020-ci ildəki Zəfərdən sonra ərazi bütövlüyünü tam bərpa etmək üçün fəaliyyətini davam etdirib və “bir gün də istirahət etməyib”. Prezident İlham Əliyev bunu Yeni Azərbaycan Partiyasının (YAP) VIII Qurultayında çıxışı zamanı deyib.

“Bizim şanlı Zəfərimizdən sonra fəaliyyətimiz ərazi bütövlüyümüzün tam bərpasına istiqamətləndirilmişdi”, - Əliyev bildirib.

"Bir gün belə ara vermədik, bu şərəfli missiyamızın həyata keçirilməsində bir gün də istirahət etmədik”,- o əlavə edib. 

Onun sözlərinə görə, Azərbaycan 2020-ci ildə başa çatan 44 günlük müharibədən 2023-cü ilin sentyabrında keçirilən antiterror əməliyyatına qədər bir neçə istiqamətdə fəaliyyət göstərib.

Əliyev bildirib ki, YAP-ın VIII Qurultayı Azərbaycanın ərazi bütövlüyü və suverenliyini tam bərpa etməsindən sonra keçirilən ilk qurultaydır. O, partiyanın VII Qurultayının 44 günlük müharibədə qazanılan Zəfərdən bir neçə ay sonra, yeni siyasi və tarixi şəraitdə keçirildiyini xatırladıb.

“Azərbaycan özü təkbaşına həm işğala son qoymuşdur, eyni zamanda, bölgədə yeni reallıqlar yaratmışdır. O vaxtdan – İkinci Qarabağ müharibəsindəki Zəfərimizdən bu günə qədər bu reallıqlar bütün dünya tərəfindən qəbul edilir”, - Prezident deyib.

Əliyev YAP-ın yaradılmasının və Heydər Əliyevin hakimiyyətə qayıdışının xalqın tələbi olduğunu bildirib.

“Yeni Azərbaycan Partiyasının yaradılması, yenə də deyirəm, xalqın tələbi idi”, - o deyib.

Prezidentin sözlərinə görə, Heydər Əliyev həmin dövrdə Azərbaycanda olsaydı, ölkədə baş verən hadisələrin və Qarabağda separatizm meyillərinin qarşısını almağa çalışardı.

“Əgər Heydər Əliyev o vaxt Azərbaycanda olsaydı, heç vaxt imkan verə bilməzdi ki, Azərbaycan xalqının başına bu oyunlar açılsın, heç vaxt imkan verməzdi ki, separatizm meylləri Qarabağda yer alsın”, - İlham Əliyev deyib.

O əlavə edib ki, Azərbaycan xalqı öz nicat yolunu Heydər Əliyevlə bağlayırdı.