Türkiyədə ultramillətçilərin dəstəyi artır, AKP və CHP zəifləyir

Türkiyədə hakim Ədalət və İnkişaf Partiyası (AKP) ilə əsas müxalifətçi Cümhuriyyət Xalq Partiyasının (CHP) reytinqləri azalır, ultramillətçi qüvvələrin mövqeləri isə güclənir, GENAR və Areda Survey şirkətlərinin avqust sorğuları göstərib.

Sorğulara görə, AKP-nin dəstəyi iyuldakı 35,2%-dən avqustda 33,6%-ə düşüb. CHP-nin dəstəyi mayda 35,6%-lə zirvəyə çatdıqdan sonra 31,8%-ə geriləyib. Analitiklər bunu lirənin dəyərsizləşməsi, inflyasiya və sosial-iqtisadi problemlərlə izah edirlər.

DEM Partiyası təxminən 10% səslə üçüncü yeri qoruyub. Hakimiyyətin müttəfiqi Milliyətçi Hərəkat Partiyası (MHP) 8%-i ötüb. İYİ Partiyası və sərt qaçqın əleyhinə ritorikası ilə tanınan Zəfər Partiyası da müəyyən artım göstərib.

Mütəxəssislər seçicilərin bir hissəsinin “Terrorsuz Türkiyə” təşəbbüsünə qarşı narazılıq fonunda ultramillətçilərə yönəldiyini bildirirlər. Həmin təşəbbüsə ictimai dəstək isə artıb — martda 34% olduğu halda avqustda 56%-ə çatıb.

 Əgər Ankara məhkəməsi CHP-nin 2023-cü il qurultayını etibarsız saysa, partiya lideri Özqür Özəl və həbsdə olan İstanbul meri Əkrəm İmamoğlu yeni EKİM partiyasını elan edəcəklər.

Türkiyədə növbəti prezident və parlament seçkiləri 2028-ci ildə keçiriləcək.

N.Təbrizli