Kelloq Üçüncü Dünya müharibəsi ilə bağlı xəbərdarlıq edib

ABŞ-nin Ukrayna və Rusiya üzrə xüsusi nümayəndəsi Keyt Kelloq Rusiya pilotsuz uçuş aparatlarının Polşa ərazisinə hücumunu təsadüf hesab etmədiyini, həmçinin Ukraynanın müharibədə uduzmayacağına əmin olduğunu bildirib. O, bu fikirləri Yalta Avropa Strategiyası (YES) Kapitallaşma Forumunun 21‑ci İllik Toplantısında səsləndirib.

Onun sözlərinə görə, “19 dron sərhədi keçib – bu, təsadüf ola bilməz. Ola bilər bir hədəf səhv seçilsin, iki ola bilər, amma 19 yox.”

Kelloq əlavə edib ki, Rusiya lideri Vladimir Putin məqsədyönlü şəkildə bu addımları atır, siqnal göndərir və həmin siqnallara cavab almaq istəyir.

“Əgər biz tarixdən dərs çıxarmasaq, o zaman Üçüncü Dünya müharibəsinə doğru irəliləyəcəyik,” – o vurğulayıb.

Amerikalı diplomat həmçinin Ukraynanın müharibədə uduzmayacağına inamını ifadə edib: “Ukrayna bu müharibədə uduzmayacaq. Ukraynalıların Rusiya qarşısında mənəvi üstünlüyü var, bu, göz qabağındadır".