Çinli Chery Rusiya bazarını tərk edir

Çinli avtomobil istehsalçısı Chery Automobile Honq-Konqda birja siyahısına daxil olmaq üçün hazırlıqlara başlayıb və bu məqsədlə 1,2 milyard dollar toplamağı planlaşdırır. Şirkət əldə olunan vəsaiti elektrik və hibrid avtomobil modellərinin genişləndirilməsinə, eləcə də xarici bazarlara çıxış imkanlarının artırılmasına yönəldəcək. Bu barədə Nikkeiyə istinadən məlumat yayılıb.

Planlara əsasən, gəlirlərin:

80%-i elektrik və hibrid nəqliyyat vasitələrinin inkişafına, 20%-i isə xarici bazarlarda genişlənməyə sərf olunacaq.

Şirkət eyni zamanda səkkizdən çox yeni modelin təqdimatını planlaşdırır.

Rusiya bazarından çıxış: sanksiyalar və iqtisadi risklər

Rusiya hal-hazırda Chery üçün Çindən sonra ikinci ən böyük bazardır. 2024-cü ildə ölkədə 325,200 Chery markalı avtomobil satılıb – bu da bazardakı hər beş avtomobildən birinə bərabərdir. Şirkətin Rusiyadakı ümumi gəlirə töhfəsi:

2024-cü ildə – 25,5%, 2023-cü ildə – 17,7% (təxminən 556 milyard rubl) təşkil edib.

Lakin Chery “Qərb sanksiyalarına və ixrac nəzarətinə əməl olunmasını təmin etmək üçün” Rusiyadakı fəaliyyətlərini tədricən dayandıracağını açıqlayıb. Rəsmi planlara əsasən, bu proses 2027-ci ilə qədər tam başa çatacaq.

Şirkət artıq 2024-cü ilin aprelində törəmə şirkətinin aktivlərini adları açıqlanmayan üç şirkətə ötürmək üçün müqavilələr imzalayıb. Hazırda Rusiya üzrə 372 diler və 687 sərgi salonu fəaliyyət göstərir.

Aytac