İstanbulda Can Holding-in rəhbəri həbs olunub

Türkiyənin Can Holding şirkətlər qrupunun İdarə Heyətinin sədri Kemal Can cümə axşamı İstanbulda aparılan cinayət araşdırması nəticəsində saxlanılıb. Bu barədə Anadolu agentliyi bildirib.

İstanbul prokurorluğu holdinq rəhbərlərinə qarşı “cinayət təşkilatı yaratmaq və ona rəhbərlik etmək”, “çirkli pulların yuyulması” və “xüsusilə böyük miqyaslı dələduzluq” ittihamları ilə iddia qaldırıb. 

Sentyabrın 11-də Küçükçekmece rayon prokurorluğu Can Holding-ə məxsus şirkətlərə, o cümlədən Habertürk TV, Show TV, Bloomberg HT telekanallarına, eləcə də Doğa Koleji və Bilgi Universitetinə həbs qoyub.

Cumhuriyet qəzetinin məlumatına görə, şirkətlərin əmlakı Əmanətlərin Sığortalanması Fondunun (TMSF) idarəsinə verilib.

Bundan başqa, 10 nəfərə qarşı da həbs orderi çıxarılıb.

N.Təbrizli