BMT Təhlükəsizlik Şurasına sədrlik Rusiyaya keçib

BMT Təhlükəsizlik Şurasına (TŞ) sədrlik Rusiyaya ötürülüb. Bu barədə xarici KİV məlumat yayıb.

Oktyabrda TŞ-nin diqqət mərkəzində Yaxın Şərq, Afrika və digər regional məsələlər olacaq. O qeyd edib ki, şura 23 oktyabrda Yaxın Şərq mövzusunda açıq debat təşkil edəcək və BMT-nin azərbaycanlı rəsmisi, təşkilatın Yaxın Şərq sülh prosesi üzrə xüsusi koordinatorunun müavini və rezident əlaqələndiricisi Ramiz Ələkbərov TŞ-də çıxış edəcək.

Səfir vurğulayıb ki, 24 oktyabr – BMT Günündə, BMT Nizamnaməsinin qüvvəyə minməsinin 80 illiyi münasibətilə xüsusi debat keçiriləcək:

"Bu debat BMT-nin yalnız keçmişin mirası olmadığını, eyni zamanda bu gün və gələcək üçün ən vacib çağırışları həll etməkdə unikal mexanizm olduğunu göstərmək üçün fürsət olacaq."

Oktyabrın 6-da isə qadınların sülh və təhlükəsizlikdə roluna həsr olunmuş debat təşkil olunacaq. Nebenzya bildirib ki, bu debat TŞ-nin 1325 saylı qətnaməsinin qəbulundan 25 il keçməsinə həsr olunacaq.

Diplomat həmçinin Afrika İttifaqı ilə əməkdaşlığa xüsusi önəm verdiklərini qeyd edib.

Səfir İranla bağlı "snapback" mexanizmini qeyri-legitim hesab etdiklərini bildirib:

"Bizim üçün bu mexanizm mövcud deyil, 2231 saylı qətnamə isə 18 oktyabr 2025-ci ilədək qüvvədə qalacaq."

Nebenzya əlavə edib ki, hazırda Ukrayna məsələsi TŞ-nin gündəliyində yer almır, lakin üzv ölkələr müraciət edərsə, müzakirəyə çıxarıla bilər:

"BMT Təhlükəsizlik Şurasının iş metodları 80 ildir dəyişməz qalıb. Rusiya sədrlik müddətində prosedurların qorunmasına, nizam-intizama və effektivliyə ciddi diqqət yetirəcək," – deyə səfir qeyd edib.

Diplomat həmçinin bildirib ki, Təhlükəsizlik Şurasının oktyabr gündəliyinə yeni baş katibin seçilmə prosesinin başlanması da daxil olacaq. Onun sözlərinə görə, ilin sonuna qədər BMT TŞ və Baş Assambleya rəhbərlərinin birgə məktubu ilə prosedura start verilə bilər.

Aytac