Luvrdakı oğurluğa görə daha bir nəfər saxlanılıb

Parisin məşhur Luvr muzeyində baş vermiş irimiqyaslı oğurluqla bağlı daha bir şübhəli saxlanılıb.Bu barədə xarici KİV məlumat yayıb.

Paris polisinin məlumatına görə, 19 oktyabrda muzeydən qiymətli tarixi zinət əşyalarının oğurlanması ilə əlaqəli olduğu iddia edilən dördnəfərlik dəstənin son üzvü də tutulub.

Bildirilib ki, saxlanılan şəxs əvvəllər həbs olunan 3 nəfərlə əlaqəlidir və Parisin “Seine-Saint-Denis” bölgəsində yaşayır. Onun barəsində “mütəşəkkil cinayətkarlıq” və “cinayət ortaqlığı” maddələri üzrə araşdırma aparılır. Şübhəlinin kimliyi açıqlanmır.

Qeyd edək ki, ötən ay baş verən oğurluq hadisəsi Luvrun “Apollon qalereyası”nda – Krallıq zinət əşyalarının sərgiləndiyi bölmədə baş vermişdi. Oğrular ümumilikdə 9 qiymətli əşyanı götürərək muzeyi tərk etmişdilər. Qaçarkən düşən imperatriçə Yevgeniyaya məxsus tac isə zədələnmiş şəkildə muzeyin yaxınlığında tapılmışdı.

Oğurluq əməliyyatının cəmi 7 dəqiqə sürdüyü, aparılan ilkin hesablamalara görə, oğurlanan əsərlərin dəyərinin 88 milyon avroya yaxın olduğu bildirilir. Hadisədən sonra Luvr rəhbərliyi təhlükəsizlik sistemində ciddi boşluqlar olduğunu etiraf edib və bir sıra qiymətli eksponatlar Fransa Bankına köçürülüb.