“Lufthansa” İsraillə hərbi yüklərin daşınmasını dayandırıb

Almaniya aviaşirkəti “Lufthansa Cargo” İsrailə və İsraildən hərbi və təhlükəsizliklə bağlı yüklərin daşınmasını qeyri-müəyyən müddətə dayandırıb.Bu barədə şirkət məlumat yayıb.

“Lufthansa Cargo” Böyük Britaniyanın ixrac nəzarəti barədə qərarı və tətbiq olunan sanksiyalar səbəbilə belə qərar qəbul edib. Qeyd olunub ki, “Lufthansa Cargo” bu daşımaların yenidən həyata keçirilməsinə imkan verəcək həll üzərində işləyir.

Qərar Almaniya kansleri Fridrix Mersin İsrailə səfəri ilə eyni gün elan edilib. Bir neçə gün əvvəl İsrail Almaniya Hərbi Hava Qüvvələrinə uzun mənzilli “Arrow-3” raketdən müdafiə sistemini təhvil verib. Berlin yaxınlığındakı aviabazada keçirilən rəsmi mərasim İsrail tarixinin ən böyük silah ixracı müqaviləsinin tamamlanmasını rəsmiləşdirib. Müqavilənin dəyəri 4 milyard avro olub.