İran Rusiyadan imtina etmək barədə Avropanın tələblərini rədd edib

 İran Avropa ölkələrinin tələbi ilə Rusiya ilə strateji münasibətləri kəsmək niyyətində deyil. Bu barədə bazar ertəsi İran Xarici İşlər Nazirliyinin rəsmi nümayəndəsi Esmail Baqai bildirib.

Baqai mətbuat konfransı zamanı qeyd edib ki, Avropanın Rusiya ilə dostluq əlaqələri saxlayan ölkələrdən bu münasibətləri dayandırmağı gözləməsi "məntiqsiz və əsassızdır".

O, həmçinin Avropa ölkələrini başqalarına tələb irəli sürməzdən əvvəl Ukrayna münaqişəsinin yaranma səbəblərini və öz davranışlarını təhlil etməyə çağırıb.

Tehran və Moskva arasında əməkdaşlıq 2022-ci ildən bəri hərbi-texniki və iqtisadi sahələrdə rekord səviyyəyə çatıb.

Qərb ölkələri İranı Rusiyaya PUA və raket tədarük etməkdə ittiham edərək mütəmadi olaraq sanksiyalar tətbiq edir.

Bu bəyanat hər iki ölkə arasında yeni "Hərtərəfli Strateji Tərəfdaşlıq Müqaviləsi"nin qüvvəyə minməsindən sonra Tehranın Şərqə yönəlik xarici siyasət kursunun sadiqliyini nümayiş etdirir.

N.Təbrizli