BMT: Cibuti sahillərində gəmi qəzasında 100-dən çox miqrant ölüb

Qırmızı dənizdə, Cibuti sahillərində miqrantları daşıyan gəminin batması nəticəsində 109 nəfər ölüb, 116 nəfər itkin düşüb.Bu barədə BMT sisteminə daxil olan Beynəlxalq Miqrasiya Təşkilatı (BMqT) məlumat yayıb.

Məlumata görə, gəmidə Cibutidən Yəmənə yola düşən 305 Efiopiya vətəndaşı olub.

Təşkilatın bildirdiyinə görə, ölənlər arasında 15 uşaq da var. Təxminən 80 nəfər sağ qalıb.

Hadisə oktyabrın 9-na keçən gecə Cibutinin Obok şəhərindən şimalda baş verib. Hazırda axtarış-xilasetmə əməliyyatı davam etdirilir.

Afrika Buynuzu ölkələrindən Bab-əl-Məndəb boğazı vasitəsilə Yəmənə, oradan isə Səudiyyə Ərəbistanına uzanan marşrut Şərqi Afrikadan miqrantların istifadə etdiyi əsas qeyri-qanuni miqrasiya yollarından biridir.