SEPAH: Hörmüz boğazında üçüncü neft tankeri minaya düşüb

Hörmüz boğazında daha bir neft tankerinin dəniz minasına düşdüyü bildirilir.

İranın IRIB telekanalına istinadən xəbər verir ki, bu barədə İran İslam İnqilabı Keşikçiləri Korpusu (SEPAH) bəyanat yayıb.

Bəyanatda qeyd olunub ki, qaydaları pozduğu iddia edilən supertanker bu gün axşam saatlarında Hörmüz boğazının cənub hissəsində dəniz minasına çırpılıb. Hadisə nəticəsində gəminin mühərrik otağında partlayış baş verib və yanğın başlayıb.

SEPAH-ın məlumatına görə, xam neft daşıyan tanker boğazdan çıxmağa çalışarkən bütün naviqasiya sistemlərini söndürüb və icazə verilməyən marşrutla hərəkət edib.

Qurum bildirib ki, son sutka ərzində Hörmüz boğazında müəyyən edilmiş marşrutdan kənar hərəkət edən üç neft tankeri dəniz minalarına çırpılaraq yanğına məruz qalıb.

SEPAH-ın Hərbi Dəniz Qüvvələri naviqasiya və tanınma sistemlərini söndürən bütün gəmilərin düşmən kimi qiymətləndiriləcəyini və onlara qarşı sərt tədbirlər görüləcəyini açıqlayıb.

İran tərəfi bundan əvvəl də iri neft tankerinin Hörmüz boğazında minaya düşdüyünü bildirmişdi. Böyük Britaniyanın Dəniz Ticarət Əməliyyatları İdarəsi (UKMTO) isə gəmilərin naməlum mərmi ilə vurulduğunu açıqlayıb.