"Hər zaman "Real"ın uduzmasını istəyirəm" – Pike

İspaniya millisinin müdafiəçisi Jerar Pike "Avro-2016"nın seçmə mərhələsində Slovakiya ilə oyunda azarkeşlər tərəfindən fitə basılmasına münasibət bildirib.

Qol.Az-ın xarici KİV-lərə istinadən verdiyi məlumata görə, "Barselona"lı futbolçu bunun Kataloniya təmsilçisi ilə "Real" (Madrid) arasındakı əzəli rəqabətlə bağlı olduğunu deyib:

"Məncə, azarkeşlər məni "Barselona" və "Real" arasındakı rəqəbətə görə fitə basdı. Ancaq mən dəyişməyəcəm. Buna görə yığma komandadan getməyi düşünmürəm. Belə etsəm, məni fitə basanları sevindirmiş olaram".

28 yaşlı futbolçu "Real" haqda sərt fikirlər söyləyib. O, Madrid təmsilçisinin hər zaman uduzmasını istədiyini bildirib: "Real"ın hər zaman uduzmasını istəyirəm. Ümid edirəm ki, onların bu mövsüm işləri yolunda getməyəcək. Mən yalnız öz klubumu çox sevirəm. Buna görə də heç kim mənim dəyişməyimi gözləməsin". 

Qeyd edək ki, İspaniyanın evdə Slovakiyaya 2:0 hesabı ilə qalib gəldiyi oyunda ispan azarkeşlər Pikeni fitə basıblar. Bunun Pikenin "Sevilya" ilə UEFA superkubok matçından (5:4) sonra "Real"ı təhqir etməsi ilə əlaqədar olduğu iddia edilir.