Ermənistan əhalisi 2 milyondan aşağı düşəcək

2100-ci ildə Ermənistanda 1,8 milyon adam yaşayacaq.

Bunu BMT-nin Əhali Fondunun erməni ofisinin təmsilçisi Qarik Ayrapetyan deyib.

BMT-nin hesabatındakı bu ürəkaçmayan proqnozun əsas səbəbi emiqrasiya və doğumun aşağı düşməsidir.

"Sadəcə, biz situasiyanın ciddiliyini anlamalı və problemin effektiv həllini tapmağa çalışmalıyıq ki, bu tendensiyanı dəyişək”, - BMT eksperti deyib.

Hazırda hökumətdə demoqrafik siyasətlə bağlı üçillik plan müzakirə olunur. Ancaq mütəxəssislər qeyd edirlər ki, belə rəsmi sənədlər çox yavaş icra edilir, qarşıya qoyulmuş məqsədlər heç də həmişə dəqiq olmur.

Məsələn, aparılan təhqiqatlar göstərir ki, ailələrin gəlirinin aşağı olması doğuma meyli azaldır, o cümlədən, uşaq bağçaları və işsizliklə bağlı problem də öz həllini tapmalıdır.

"Çünki biz indi elə zəmanədə yaşayırıq ki, ailəni yalnız bir nəfər dolandıra bilməz, ikinci işləyən də olmalıdır. Yalnız bu zaman uşaq ailənin rifahı üçün əngəl ola bilməz", - Ayrapetyan deyir.

Demoqraf Ruben Eqanyan əmindir ki, yalnız siyasi-sosial-iqtisadi inkişaf vəziyyəti dəyişər və pessimist proqnozları yumşaldar. Ekspert qeyd edir ki, vətəndaşların ölkənin gələcəyi ilə bağlı ümidləri olmalıdır, hiss eləmədirlər ki, ölkədə ədalət var: "Bu günkü araşdırmalar göstərir ki, onlar iki-üç uşaq istəyirlər, amma reallıq onları bu istəyə çatmağa qoymur”, - o deyir.

Ruben Eqanyanin fikrincə, Ermənistanda doğum həddinin aşağı düşməsində əsas səbəblərdən biri emiqrasiyadı. Eqenyan əmindir ki, emiqrasiyanı da iş yerlərinin olmaması, az əmək haqqı stimullaşdırır.

Təhqiqatlar göstərir ki, Ermənistanı tərk edənlər başqa ölkələrdə uğur qazanırlar, vətəndə isə onların çox az hissəsi öz biznesini imkişaf etdirə bilərdi.

"Bu gün iqtisadi monopoliya xırda və orta sahibkar üçün əlverişli deyil, onlarsa aktiv adamlardılar və ölkədə qalıblar, nə isə qurublar, iki-üç adam üçün iş yeri yaradıblar. Bu gün həmin aktiv kütlə də ölkəni tərk etməyə başlayıb. Əgər iqtisadi sferada bir dəyişiklik olmasa, nəsə gözləmək çətindir”, - ekspert deyir.

Dünyada da əhali sayı azalacaq

BMT-nin proqnozuna görə, uzaq perspektivdə dünyada əhalinin sayı azalacaq. Məsələn, 2100-ci ildə Azərbaycanda 9,5 milyon, İranda 63-64 milyon, Türkiyədə 87 milyon, Gürcüstanda 3,5 milyon adam yaşayacaq.

Faktiki, bu tutqun mənzərədə ən pis proqnoz Ermənistan üçündür...

 

(Azadliq.org)