5 ölkə işğal üçün uyğun vaxtı gözləyir – Kəşfiyyat şefi

Beş ölkənin ordusu Sudanın paytaxtı Xartuma hərəkət etmək üçün lazımı vaxtı gözləyir.

Anews.az publika.az-a istinadən xəbər verir ki, bu haqda Sudanın kəşfiyyat şefi Salah Abdullah Quş bildirib.

"Sudanda özlərinə müqavimət göstərəcək kimsənin qalmaması üçün xaos, qarət və ölüm hadisələri ilə ölkəni məşğul edən 5 ordu Xartuma doğru irəliləmək üçün uyğun vaxtın gəlməsini gözləyir", - o, Sudan Təhlükəsizlik Təşkilatının 42-ci məzuniyyət mərasimində çıxışında deyib.

Lakin o, sözügedən 5 ölkənin adını çəkməyib.

Ölkədəki solçuların və üsyançı hərəkatların iqtidarı ələ keçirməyə çalışdıqlarını söyləyən kəşfiyyat şefi ölkədəki bəzi siyasi qüvvələrin maraqlarının xarici güclərlə əlaqəli olduğunu vurğulayıb.

Qeyd edək ki, dekabrın 19-da hökumətin çörəyin qiymətini qaldırmasından Nil çayı sahilindəki Atbera və Port Sudan şəhərlərində başlayan etiraz aksiyaları qısa müddətdə bir çox əyalətdə hakimiyyət əleyhinə nümayişlərə çevrilib.