Rusiyaya yeni sanksiyalar: Avropa uçurumun kənarında

 

Axar.az xəbər verir ki, ABŞ Rusiyaya qarşı əlavə sanksiyalara başlamaq qərarına gəlib. Yeni sanksiyalara Avropa Birliyinin də (AB) qoşulacağı gözlənilir.

 

AB Xarici İşlər nazirləri maliyyə, müdafiə, texnologiya və enerji sahələrində Rusiyaya qarşı sanksiyaların genişləndirilməsi mövzusunda razılığa gəlib.

 

AB-də fikir ayrılığı

 

Qeyd edək ki, ABŞ-dan fərqli olaraq Rusiya ilə sıx ticari və enerji əlaqələri olan AB ölkələri sanksiyaların genişləndirilməsini əslində o qədər də istəmir. İngiltərə sanksiyaların genişləndirilməsini tələb etsə də, Rusiyaya milyard dollarlıq döyüş gəmisi satmağı planlaşdıran Fransa və sıx ticarət əlaqələri olan Almaniya sanksiyaların məhdud olmasını tələb edir. Bundan başqa mütəxəssislər Avropanın ən böyük neft və qaz tərəfdaşı olan Rusiya ilə münasibətləri soyutmağın Avropa iqtisadiyyatına əhəmiyyətli dərəcədə zərər verəcəyini düşünür.

 

Sanksiyalar labüddür

 

AB Xarici İşlər və Təhlükəsizlik Siyasəti idarəsinin nümayəndəsi Ketrin Eşton iyulun 24-də Avropa Komissiyasının Rusiyaya qarşı maliyyə və müdafiə sektorlarını əhatə edəcək yeni sanksiyaların qəbul ediləcəyini bildirib.

 

Xarici İşlər nazirlərinin verdiyi ümumi bəyanatda Rusiyadan separatçı qrupların silahlandırılmasını dayandırmaq, Ukrayna sərhədindən ordunun geri çəkilməsi tələb olunub.

 

Eston keçirdiyi mətbuat konfransında tələblərin yerinə yetirilməyəcəyi təqdirdə yeni sanksiya paketlərinin qəbul edilməsinin labüd olduğunu bildirib.