"Facebook" sosial şəbəkəsinin adı dəyişdiriləcək

Feysbuk şirkəti gələn həftə adını dəyişdirməyi planlaşdırır.

Bu barədə "Verge” portalı məlumat yayıb.

"Facebook" "metakainat" qurmağa olan diqqətini əks etdirmək üçün gələn həftə adını dəyişdirməyi planlaşdırır", - portalın yaydığı məlumatda deyilir.

Feysbukun rəhbəri Mark Zukerberqin sözlərinə görə, yaşamaq və şəhər mərkəzindən uzaqda işləmək istəyən "metakainat" yaradıcılıq peşələrinin sahiblərinə, həmçinin təhsil və ya istirahət obyektlərinə girişin məhdudlaşdırıldığı əyalətlərdə yaşayan insanlara böyük imkanlar verəcək.

Cari ilin iyulunda Mark Zukerberqin virtual dünya hazırlamaq planlarının ciddiləşdiyi məlum olub. İstifadəçilər bu dünyada bir-birini görüb eşitməklə yanaşı, həm də fiziki olaraq da hiss edə biləcəklər. Şirkət layihə ilə məşğul olacaq komandanı da elan edib, yeni mühəndislərin cəlb olunduğunu açıqlayıb. Avqustda feysbuk, videokonfrans və ya "Oculus VR" qulaqlıqdan istifadə etməklə bağlana bilən virtual "Horrison Workrooms”u təqdim edib.

"Facebook" sosial şəbəkəsi 2004-cü ilin fevralında 19 yaşlı amerikalı tələbə Mark Zuckerberg tərəfindən yaradılıb. Bir müddət sonra şirkət Markı dünyanın ən varlı insanlarından birinə çevirib. Mark Zukerberqin adı dünyanın ən gənc milyarderi kimi Ginnesin "Rekordlar" kitabına da düşüb.