Rusiyanı təmsil edən hakimin Avropa məhkəməsində fəaliyyəti durduruldu - RƏSMİ

2022-ci il yanvarın 2-dən Avropa İnsan Haqları məhkəməsində fəaliyyətə başlayan Rusiyalı hakim Mixail Lobovun səlahiyyətləri dayandırılıb. Bu barədə Avropa İnsan Haqları Məhkəməsinin saytı xəbər verir. 


"Rusiyanın martın 16-dan Avropa Şurasından çıxarılmasının hüquqi nəticələri aydınlaşana qədər Mixail Lobovun  səlahiyyətləri dayandırılır. Bundan başqa Avropa Məhkəməsi Rusiya vətəndaşlarından daxil olan şikayətlərin araşdırılmasını da dayandırıb",  - məhkəmənin saytı yazır. 


Ekspertlər bildirir ki,  bu qərar martın 16-dək  müraciət edən Rusiya  vətəndaşlarına şamil edilməyəcək.Onların şikayətinə baxılacaq. 


Belə ki, Avropa Şurası Nazirlər Komitəsi martın 16-da Ukraynanın Rusiya tərəfindən təcavüzə məruz qalması səbəbindən Rusiyanı üzvlüyündən dərhal çıxarmaq barədə qərar verib. Buna səbəb Rusiyanın Avrpa Şurasının nizamnaməsinin kobud şəkildə pozması olub. 


Yaranmış durum Rusiya hüquq müdafiəçiləri tərəfindən narazılıqla qarşılanıb.  Məsələn "Memorial" Hüquq Müdafiəsi Mərkəzindən olan Tatyana Qluşkova bildirib ki, bununla Rusiya vətəndaşları ölkdə pozulan hüquqlarının bərpasından məhrum olublar. 


O həmçinin bildirib ki, Rusiya Avropa Şurasının yüzdən çox konvensiyanda içtirak edir. Bura təkcə insan haqları deyil həm də korrupsiya ilə mübarizə və çirkli pulların yuyulması ilə bağlı konvensiyalar var. Bu layihələrin taleyinin necə olacağı bilinmir. 


N.Təbrizli

www.anews.az